|
K'OLXAŞİ MAPANOBA
K’olxaşi (K’olxis, K’olxida, K’olxeti) Mapanoba, Lazepe-Margalepeşi p’ap’ulepek na gedges oxen3ale ren. Lazepe-Margalepeşi irişen mcveşi ist’oria, K’olxaşi oktala do k’ult’uraşi spero k’ala xolosi k’ont’akt’oni ren. K’olxaşen molaşineri maartani ç’arape İ.3’. 16- 17. oş3’anuraş Hitituri noç’arepes na molişinen K’aşk’ape ren. Mara İ.3’. 12. oş3’anuraş Asuruli noç’arepes na ren “K’ilçi”, K’olxepeşen direkt’ot na molaşinaps maartani noç’are ren. K’olxaşi coxoşen çkinerot maartani fara İ. 3’. 8. oş3’anuraş tarixoni Urartuşi noç’arepes molişineren. K’olxaşi coxoşen mcveşi Grek’ia do Romaşi matarixepekti “Kolkhida” do "Kolkhis" yado dido molaşinerenan. K’olxaşi oktalaş spero, andğanerdğas Abxaziaşi doloxe doskideri Gagraşen geç’k’ap’t’u do Ç’oroxişakis nunç’uşut’u. K’olxaşi k’ult’uraş speroş sinorepeti andğanerdğas Rusiaşi doloxe doskideri Gelinciğişen geç’k’ap’t’u do Unyeşakis nunç’uşut’u.
K’olxa, Homeriuri epok’aş Grek’epeşi onç’eloni spero rt’u. Argovnat’epe, Uçazuğa mojiluten “Okro Post’i” eç’opinu şeni Mapa Aietiş dobadona, K’olxaşa k’uçxe gedgeret’es. İ.3’. çkvadoçkva ç’areli odudepes, Omjoreyulva Uçazuğaş regionis na skidut’eren, artikarti k’ala oxokteri do K’olxaşi vadis dobargerepeşi mzaxali na rt’eren k’abilepeşen molişinen. İlmiuri k’oçepeşk’elen ik’abulinen; Lazi, Tzan, Tzani, Tçani, Zani yado na molişinen etnik’uri t’erminepek K’olxepe şeni na ixmarinen do irxolo t’erminik artneri k’avmi na no3’iraps. 5. Minorskyik, t’ermini Çani şeni Grek’uri Sannoi/Tzannoi t’erminepe k’ala artneri tkvala ren ya do P’rok’op’iusikti Tzani varna Kolkhis yado na içkinen xalk’is a3’i Lazi icoxinen ya tkveren.
Urartupe k’ala na ixvenu limapek K’olxaşi Mapanobaş menceli kodork’inu do oxen3ale dosap’aru. Edoxolo K’imerepeşi nat’k’va3ute na isap’aru K’olxaşi Mapanoba, Romaşi İmp’arat’orobaşk’elen kodilixvu do Apsilia, Abazgia, Misimia, Sanigia k’ala Lazik’a, Svaneti çkvaneri mapanobapeşa ok’uirtu. İ.3’. 1. oş3’anuras K’olxaşi (Lazik’a/Egrisi) do Kartlişi (İberia/Okortura) Mapanobapeş şkas artikartis xe3ala gejodgitu na noğirapt’u naqononi limape ixvenu.
|
TÜRKÇE
