|
AŞİRET'URİ DOGURONİ
Aşiret’uri doguroni guin3’k’u Sult’an Abdulhemidi majuranişk’elen 21 St’aroşina 1892-s. Gamantanas geiç’k’inu 3’oxle Akaretleris na gedgin binas. Ok’ule doguroni itirinu K’abat’aşis na ren Esma Sult’aniş K’onağişa. Na geink’ilu dğaşakis gamantanaşa akonaşis naqonu. Am doguroni guin3’k’u aşiret’epe dido na skidut’u k’ortape xes okaçu, entepeşi reisi do ağapeşi berepe Osmanuri k’ult’urate gamantanu, oxen3ale do saltanat’işa menç’işu şeni.
Doguronişa iptinerot Halep’i, Bağdati, Surie, Musuli, Basra, Diyarbekiri, Trablusgarp’işi vilayet’epeşen do K’udusi, Bingazi do Zurişi sancak’epeşen, xemaxvenconi do şineri ocağepeşi, 12 3’anerişen 16 3’anerişa berepe eizdineret’u. Jur 3’anoni gurapaşi p’rogramaşen xut 3’anoni gurapaşi p’rogramaşa na iktirinu doguronis, Qurani Kerimi, fikixi, ilmixali steri religiuri çkinapa k’ala emoraşi fenuri çkinape, Fransuli nena, Turkuli nena, geografia, ist’oria, ç’araloba do malimuri dersepeti igurinu. Doguronişa 3’oxle eizdinu arxvala Araburi aşiret’iş reisepeşi berepe. Meqoneri 3’anapes, Kurduri do Albanuri aşiret’epeş reisepeşi berepeti eizdinu. Aşiret’uri doguronişen gamaxtimeri berepe mendiçkvinu Xarbiye do Mulkiyeşi doguronepeşa. Doguroni rt’u oncironi. Mamgurepeşi mtel mesrafepe niçinu oxen3aleşk’elen. Amuşen met’a, k’arta mamgures niçinet’u tuteri xeşpasi. K’lasişi nak’onoba rt’u 40. Aşiret’uri doguronişi nizamname do jur 3’anoni dersuri p’rograma niçinu ar tezk’erete Sadrazam Cevad Paşaşk’elen Sult’an Abdulhemidis, 8 X3ala 1892-s.
Am nizamnamete, Aşiret’uri doguronişi muşiurepe aşo rt’u: Aya ren xut 3’anoni oxen3ale-ugeç’areloni doguroni. Doguronişa eizdinasunon 12- 16 3’aneri nosi do xuraten k’ap’et’i aşiret’uri berepe. İptineri 3’anas 50, majura 3’anapes 40 mamgure ezdute, doguronişi nak’onoba iqvasunon 210. Mamgurepes niçinasunon 30 k’uruşi tuteri xeşpasi. Doguroni na oçodinasunonpeşa, aşiret’i mutepeşa goiktaşi, ekonaşis na guin3’k’asunon doguronepes mamgurepaloba varna majura odulyobapes memuroba niçinasunon. Mtel imp’eriaşi dixas, mtel aşiret’epeşen mamgure na ezdu Aşiret’uri doguronis na igurapt’u mamgurepek, k’arta jur 3’anas ar fara oxen3aleşi geç’arelite do zabitepeşi maktalobate mendiçkvinet’u noğa mutepeşişa. Aşiret’uri doguroni na oçodinapt’u ağanmordalepeşa anşi tutoni Xarbiyes st’ajiş k’ule leit’enant’işi rutbe niçinet’u. Noğa mutepeşişa guiktes do Hemiduri alayepes odulyoba qves. Aşiret’uri doguroni geink’ilu 1906-s.
|
TÜRKÇE
