|
HALİT REFİĞİK ŞURİ KOMEÇU
Halit Refiği dibadu 5 Mirk’ani 1934-s İzmiris. Doçodinu maarta do oşkari doguroni Şişlişi Terakki Lises. İk’itxu Robert’i K’olecişi İncinerobaşi burmes. Notamamu malimuri servisi rezervuli zabitot K’oreas. Yeşiğu ekonaşis 8 mm-oni namtini filmepe. 1956-s Nijat Ozoni k’ala artot na gamoçkves “Sinema”, “Kim” (“Mi”) coxoni jurnalepes do “Yeni Sabah” (“Ağani Ç’umani”) do “Akşam” (“Limci”) coxoni gazetapesti doç’aru sinemaşi k’rit’ik’epe. İqu manuşvale Atif Yilmazişi filmi “Oskedu ren çkimi hak’i”-s.
Muşi filmepete; Mosk’ova, Ağani Delxi do Sorrentoşi Filmuri Fest’ivalepes emus niçinu çkvadoçkva p’rizepe. 1964-s, “T’exişi K’vinçepe”-te niçinu emus irişen k’ai maktalobaşi p’rizi Antalyaş Okroşi Portuk’alişi Filmuri Fest’ivalis. 1970-oni 3’anapes Yeşilçamik k’rizi na z’iru steri, Halit Refiğik kogeç’k’u t’eleviziuri filmepe oxvenus. 1974-s, (İDGSA) “Mp’olişi Mskva Xeşnoxvenepeşi Ak’ademiaş filmişi arkiviş k’elen geç’k’eri gamantanaşi dulyapeşati numxvacu emuk. Qu mamgurepaloba sinemaşi k’ursepes. 1975 3’anas İDGSA-şi Sinema-TV Enst’it’us mamgurapalot oxanduşa kogeç’k’u.
1975-s yeşiğu “Aşk-i Memnu” (“Puleri Qoropa”) coxoni filmi TRT-şi coxote. TRT-şi nok’itxuş k’omisias vazife niçinu. TRT şeni yeşiğu Kemal Tahirişi “Doç’k’indineri Malime” coxoni xvena. 1976-s Amerik’aşi Ok’ont’aleri Oxen3ales, Viskonsinişi Universit’es, 1984-s Oxaoşi Denisonişi Universit’esti gamantanaşi odulyobas ak’atu. 1997-s, Mimar Sinanişi Universit’eş Senat’oşi gonk’vataten emus niçinu “Xçetomonobaşi P’rofesoroba” unvani. Halit Refiğis uğun 300-şen met’a st’at’ia do goşogoraşi ç’ara. Emus uğun “Nasionaluri Sinemaşi K’abğa” coxoni arti svara. İbrahim Turkik na ç’aru do muşi skidala do filmepeş jin det’aluri ok’oğarğalape na noç’ars “İzmocepeşen Simadapeşa” coxoni svara 2001-s gamiçkvinu. 11 Gimua 2009, ç’umani saat’i 08.20-s na ğuru Halit Refiğik ok’aoba z’iropt’u 28 Mariaşina 2009 tariğişen doni Oxzabune Memorialis, safraşi arxis na uğut’u tumorişi sebebiten. Halit Refiği niçinu let’as oğurunale Zincirlikuyis, meçeti Teşvikiyes ondğeneri nemazişa meqoneri cenazeşi nemaziş k’ule. İrmak Zilelik Halit Refiğişen na ezdu int’erviupe na gamoçkvu do Mbulora 2009 tariğis gamaçkvineri svara, “Mtinoba goşobgori, mskvalinas vaqoropi”-k oxomo3’onapan muşi sinemaşi gagnapa det’alurot.
Emuk na qu beciti filmepeşen namtinepe aşo isvaren: “Tanuraşi Maçumalepe” (1963), “T’exişi K’vinçepe” (1964), “Otxo Oxorca Xaremis” (1965), “Mepçi Çkim Guri Ar Turkis” (1969), “Puleri Qoropa” (T’eleviziaşi filmi), “Doç’k’indineri Malime” (T’eleviziaşi filmi, gza var niçinu oz’iramuşa), “İxtirasişi İxi” (1983), “Dadi Çkimi” (1986), “Momişletini” (1987).
|
TÜRKÇE
