|
QALBİ DİP'LOMATEN İXANDEPT'U
Adiyamanişi Kyaxta coxoni raionişi Yahya Kemal Geç’k’apuroni Doguronis na ixandept’u ar mamgurapales qalbi dip’loma na uğut’u oxoi3’onu. Am mamgurepalek qalbi dip’omaten vit 3’anaşen doni mamgurapaloba ikipt’eren. Raionişi Gurapaşi Direkt’orik, na iğodinu ar ixbari k’ala dulya goşogoru do M. Y. coxoni k’oçik qalbi dip’lomaten mamgurapaloba na ikipt’u oxo3’onu do iristi ognapu.
M.Y. coxoni saxtekyari k’oçik Selçuk Universit’et’işi Oguruşi Fak’ult’et’işi Germanuri Nenaşi Burmeşen eç’opineri na ren cuma muşişi dip’lomaşi jin taxrifat’i qveren. Aşopetenti am taxrifatoni dip’lomaten, tayinobapeşi p’eriodisti Na3ionaluri Oguruşi Nazirobaşen dulya ak’vanderen. 1996 şi 3’anas İspart’aşa Nazirobaşi tayiniten ideren do ekonaşis sum 3’anaş morgvalis ixanderen. 1999 şi 3’anasti xolo Nazirobaşi tayiniten Adiyamanişi Kyaxta coxoni raionişa ideren.
Terpal coxoni oput’es jur 3’anaşi morgvalis, Kocatepe coxoni oput’es jur 3’anaşi morgvalis do Yahya Kemal Geç’k’apuroni Doguronisti sum 3’anaşi morgvalis ixanderen.
Raionişi Oguruşi Direkt’oris na moxtu ixbari k’ala, mufet’t’işepek k’oçis goşugores do saxtekyaroba dodeşifres do qalbi dip’lomaten na ixandut’u dosia muşi p’reqot’uras nuncğones. Mufet’t’işefek ti-muşi goşigoren yado na ognu M.Y. astaxolo na skidurt’u oxori ar ndğas doloxe moçoderen do imt’eren.
Saxtekyari mamgurapales dido mağali borcepe uğut’eren ekoni mtel esnafişa. A3’i em k’oçi p’oli3ielepek mtel Turketis gorupan.
|
TÜRKÇE
