DUDBUT'K'A

MAÇ'ARE DANİEL PİPİA

“Margali Baironi” na ucoxopt’es Daniel Pipia 1896 3’anaşi 1 Mbuloras Zugdidiş mazraş oput’e Obucis dibaderen P’avle Pipia do Ketevan K’virk’veliaş k’eras. Çil do kimocis Danielişakis jur biç’i bere duğurerenan do Danieliş dobadinu entepe şeni dido oxeluşi rt’eren. Mara Danielikti berobaşen zabuni iqu, marz’gvani xe do k’uçxes nuzuli geçameri rt’eren. Babak dido hekimepeşa iqonu Danieli, mara emus mutuk var naşvelu. Jurdogverdi 3’aneri rt’uşi baba duğureren, 7 3’aneri rt’uşi nana do kodoskidu aşo dalepeşi xes. Emuk jur k’lasoni n3’opula Obucis doçodinu do majurani n3’opulaşa idu mara ogurapuşi para na var uğut’u şeni ek var aguru. Ok’ule emuk Kuteşişi Gimnazia doçodinu do Obucis mamgurapaleten oçalişus kogeoç’k’u. Am orapes ok’oiçinu çkva didi K’olxepe k’ala: K’alist’rat’e Salia, Leo Kiaçeli, Egnat’e Pipia do entepe k’ala oput’e muşi şeni dido şeepe qu.

Danieli K’olxuri nenate ç’arupt’u. Emuk na ç’aru p’aşura “Xumla K’oçi” qoropa do k’oçinobaş heykeli ren. Çkva Margaluri leksepeti dido mskva do maanoni renan. Danielik xolo 1855- 1856 3’anapes na iqu Margaluri Ant’ifeodaluri Tie3’ozdalu şeni ist’oriuli p’oema “Bulatia” ç’areren. Daniel Pipiak Margalur- Kortuli leksik’oni şeniti mat’erialepe k’oroberen do dido mskva ar xanda ok’odgineren, mara Pipias eya var açodinu.

Daniel Pipia sosialur-demok’rat’iuri p’art’iaş mak’ature rt’u do Okortule Rusi bolşevik’epek baxvaten keç’opeş k’ule, emuk çkva p’at’riot’epe k’ala dobadonaş moşletinu şeni osimadus kogeoç’k’u. 1924-s na ixaziret’u ant’ibolşevik’uri tie3’ozdaluşi 3adalas emukti ak’atu. Zugdidiş mazras madudale p’rop’agandist’i rt’u. Mara am tie3’ozdalu var ixvenu, bolşevik’epek mteli revolusionerepe oç’opes do goxves. 28 3’aneri Daniel Pipiati entepeşi doloxe rt’u. K’omunist’uri orapes Danieliş coxoş oşinu nk’ileri rt’u. Emuş noç’arepe ç’upt’es. Mara ç’it’a xolo kodoskidu do entepeşen jile na işinu steri; p’oema “Bulatia”, p’aşura “Xumla K’oçi” do muk’otxani leksi ren.



                                                                                                                                                              TÜRKÇE