|
LAZURİ K'ULT'URA
Tarixi, Nena, Anane do Sosialuri xali yado tudeni noç’are na uğun do Kamil Aksoyluş k’elen na ixazirinu svara, Gamamçkumala Phoenixişi seria Sosyologiaşen Mbulora 2009-s Ank’aras gamiçkvinu. Edit’oroba muşi Bulent Ozçelikik, grafik’a muşi Leyla Çelikik na qu Aksoyluşi xandas, Jap’oni nenamçkinace Goichi Kojimak Lazuri nena temoni simada muşite, arkeonometrist’i Dr. Mustafa Kibaroğlukti antik’uri oraşi Lazuri k’ult’ura (K’olxuri k’ult’ura) temoni simada muşite numxvaceren.
Svaraşi k’ap’ulas: “Xes na okaçapt svaraşi xandape "93 3’anaşi p’rosesi" yado na molapşinapt 1993 3’anas na yeçkindu Lazuri k’ult’uraşi oxonk’anate geoç’k’u do gamaçkvaşa henuz niktu. Lazuri k’ult’ura şeni andğaşakis na ixvenu irişen şumuli xanda ren. Nena, alboni, tarixi, ç’aranoba, ogeare, xalk’uri ocerape, skidala do ananepe steri şumuloni na ixvenu am xandaşi temeluri odude ren sahaluri goşogorape. Nağdi, anane, adeti, leksi, destani, p’aşura do originali ogeare k’ala andğas na itkven sotiş coxope, k’ortas na skidun 300 k’onari mzguda do skindinaşi coxope, nanç’inerot 800 k’onari dinotkvame do notkvamepe, 30 k’onari berepeşi sterapa do steraşe itespitinu do iç’arinu. Lazuri dialekt’epeşi fonemepeş irxolo na uğun 38 bonconi Lazuri alboni oxmarute na ixvenu am xandak, moxtanoras Lazuri k’ult’ura şeni na ixvenasunon xandapeşa odudoba oxvenu inoğiraps.” ya noç’ars.
Turkuli nenaş ogurus geç’k’aponis gevoç’k’i mara Lazuri, nena na ren 35 3’aneri vort’işi oxovo3’oni ya na zop’ons Aksoyluk, svara oç’aru şeni gzas gebdgiti yado itirafups. Xolosi golaxtoras do andğas Lazepeşi skidala k’ult’urulot goşobgori, ç’areli odudepeşen met’a otkvoni odudepe eşap’ç’ari do sahaluri goşogorape mtelot ma p’i yado idia ikips. Lazuri nena do k’ult’ura, ğirsoni Turkiaşi tarixuri do k’ult’uruli xampobaşi ar no3’ile renşi gagnapate, Lazepeşi tarixuri do etnik’uri cinci temoni vardo mtelot folk’loruli ar xanda na qu ik’abulups. Andğaşakis na ixvenu xandape udobağine do dork’ineri na ren şeni Lazepeşi mtini skidala do mtini minoba oçinapu mevoğiri, am speroşi xandape p’olit’ik’uri mogapapeşa do huzuri ok’oxvuşi simadapeşa malzeme var p’i do irişen didi temenni k’ult’uruli temaş gale ugamaxtimu miğun yado mesaji meçaps.
Numçinuşi nomera: 0312 419 97 81
|
TÜRKÇE
