DUDBUT'K'A

OGNİ SKANİ NENA!

Ogni skani nena! ren Turkialuri Lazepek na gamoçkves maartani k’ult’uruli svaruli. Mp’olis na gamiçkvinu svarulişi mance do ç’araşi mesuli direkt’ori Mehmedali Bariş Beşli, gamaçkvaşi direkt’ori Ahmet Xacaloğlu (Ahmet Hulusi Kirim), gamaçkvaşi k’oordinat’ori Ali İslamoğlu (Ali İhsan Aksamaz) rt’u. Svarulişi 1. k’oro3xa 3’ilva 1993-s, 2. k’oro3xa 3’anağani 1994-s, 3. k’oro3xa Mirk’ani-İgrik’a 1994-s, 4. k’oro3xa Pukrik’a-Mbulora 1994-s, 5. k’oro3xa X3ala-Mariaşina 1994-s, 6. k’oro3xa St’aroşina-Gimua 1994-s gamiçkvinu.

Ognis uğut’u noğira, Lazi xalk’işi yeç’k’oduş şkurna na omç’un nena do k’ult’uraş oskedinu, m3ika na içkinen tarixi goşontanu do Lazepeşi gonç’k’iru. Svarulişi noğiraşen arteriti rt’u Lazepeşa K’avk’asiuri minobaşi şuuri meçamu şeni ocedelu do K’avk’asiuri cinconi majura gamantanerepe k’ala ok’omxvacute xandapeşi omordinu. K’vazaluri t’erminologia na uğut’u svarulis Lazur nasionalist’uri namtini noç’arepesti moixvadet’u. St’at’iape irote Turkuli na iç’aret’u svarulis Lazuri p’aşurape, hekayepe, leksepe, manepe, oz’i3inonepe, t’ekst’epe, notkvamepe, megnapape, k’arik’at’urepe, alboni, nenaçkina, leksik’oni steri burmepe gez’it’u.

Ognişi “Gamavoçkumert” coxoni ç’araş çodina p’aragrafis: “Am p’ersp’ekt’ivi muşite Ognik ar k’ele, Anatoliaşi mozaik’aş no3’ile Lazepeşi nena, tarixi, ç’aranoba, folk’lori, musik’a, sosiologia, etnografia, arkeologia, geografia do çkva; ilmi, k’ult’ura, xeşnoba, goşogora, oçinapu do ağanşe gedguşi noğiraş gamaçkvate oirkianuri k’ult’uras numxvacasunon do majura k’ele K’avk’asia do Anatolias na skidun xalk’epeşi oşkari xonari, k’ortaluri xalk’epeşi cumalobaş xinci iqvasunon.” yado geç’art’u. Ognişi maartani k’oro3xa, jur st’at’ias “maok’ortoba” ixvenen yado idiate Mp’olişi maxkemeş k’elen ik’orobinu do am idiate dava ixvenu. Ogni, 4. k’oro3xaş arefes diberatu mara svarulişi maamagepeşi nizaş sebebite 6. k’oro3xaş k’ule var gamiçkvinu.

Yeç’k’oduş şkurna na omç’un xalk’i, k’ult’ura do nena muşi na imanceps Lazepeşi gama3’iru yado misia muşi na ognapapt’u Ogni, Turkiaşi etnik’uri p’olit’ik’apeşa na yedgitut’u p’rot’est’işi simboli iqu. Svarulişi 3. k’oro3xas Ognişi roli, daz’oni telite goğoberi umçire gza na o3’iraps k’arik’at’urite oxoi3’onapet’u: T’abelas “Arteri nena, arteri k’ult’ura, arteri nasia” geç’art’u, Lazi jur çil-kimocis Lazuri nena ç’areli elagzaşen oxtimu unt’es mara daz’oni ğoberik var goloxçkumert’u. Lazuri k’ult’uraşi aksioni şeni doguraleşi fonk’sioni na uğut’u Ognik, Turkias do kianas dido nç’ela z’iru do Lazepeşi k’ult’uruli ronesansiş geç’k’ala iqu.



                                                                                                                                                              TÜRKÇE