|
OBLEZ'GU DO UXAZMOBA
Oblez’gu, k’uç’i vana esofagusişi hava korbaş adaleşi ok’ozdute p’icişen meç’ireli gamoçkvinu ren. Oblez’gu didote k’uç’işi ulseri, k’uç’işi k’ardiaş ok’oxvobape vana safraşi gzalepe do keseşi zabunobapes na yeçkindun nişani ren. Uxazmoba, oç’k’omuş k’ule k’uç’is na yeçkindun uraxat’oba ren. Uxazmoba, omgvanuşi ok’oxvobaş nişani do xolo oxazmuşi sist’emaş zabunobaşi nişaniti iqopen. K’uç’işi ulseris, k’uç’işi k’anseris, gastrit’is, safraşi keses do gzalepeşi zabunopes uxazmoba iz’iren.
Oblez’gu, k’uç’is na ok’ibğen gazi esofagusişa do ekolenti p’icişen gamoçkvinute iqven. Manişa oç’k’omu, oşumalepe k’et’ite oşu, sak’izi olağunu, şekeri o3’u3’onu, z’igara oşu do uk’ap’et’e p’rotezi oxmaru steri mutxanepek havaşi geaşkvinu operpinaps. Na geişkvinen havak k’uç’is gaziş yopşinuşa do k’ronik’uri oblez’guşa gza meçaps. Oblez’gu, raxat’i na ok’oxups do mçire mç’uşi hidrogeni do k’arbondioksit’işi gazepek sebebi na iqven şikayeti ren. Mç’us k’aixeşa na var dğulun k’arbonhidrat’epeşi mçire mç’us bakt’erepeş k’elen opaşuş oras gazi yeçkindun. Dik’a, yulafi, lazut’i, dixaşmarkvali do namtini lilve do xilaş doloxe na iqven k’arbonhidrat’epe mçire mç’us mtelot var ixazmen do var indğulen.
K’uç’is yopşerobaşi hisi, k’uç’is ç’vini do omç’oxu, korba obaru, oblez’gu, moboqinu, ink’ibazoba nadiren korbaçxala ren uxazmobaşi nişanepe. Uxazmobaşi maartani sebebi ren oç’k’omalepeş k’ai varolağunu. Majura sebebiti ren dido yağoni do nişastoni oç’k’omalepete oskedinu. Antepe, oxazmu zori oç’k’omalepe renan do k’uç’is do mç’us dido çumenan. Antepeşi mç’us dido dodgitu ink’ibazobaşiti sebebi ren. Mç’uşi tenbeloba na itkven zabunobaş yeçkinuduşi sebebiti ren oxazmu zori na ren oç’k’omalepete oskedinu. Uxazmobaşen ti oçvu şeni uk’ors; yağoni do mkironi oç’k’omalepe m3ika oç’k’omu, lilveşi oç’k’omalepe do zemzevatepete oskedinu, oç’k’omuş k’ule mkironi loqape vardo taze xila oç’k’omu.
Uxazmoba k’uç’işi dido ifrazişen yeçkindun na, oç’k’umuşen ar-jur saat’iş k’ule k’uç’iş ç’vini, omç’oxu, omşkironu do tazyik’i iqven. Mç’oxa oblez’gu, p’ici do xurxişi gazepeş omk’olanu, baziti mç’oxa ontxoru ren k’uç’işi dido gazepeşi nişani. K’uç’işi asidi na monz’inaps cumoni, şekeroni, baharatoni oç’k’omalepe, xor3işi k’onservepe, ç’verepe, çai, k’ave, z’igara do alkol’i var işvasunon do var iç’k’omasunon. Xor3i, markvali, taze qvali, mja steri p’rot’einoni edo uncume do m3ika yağoni oç’k’omalepek perhizi şeni feide meçapan. Uxazmoba k’uç’işi udobağine asidişen yeçkindun na, oç’k’omuşen ar-jur saat’iş k’ule k’uç’is monk’anobaş hisi, korbaçxala, t’u3anobaşi nobetepe do tişi 3’k’uni iz’iren. Kovali, bayati do ç’veri iç’k’ominasunon, çorba uyağoni do dido cumoni rt’asunon. Çai, k’ave, baharati serbest’i ren. Xuraşi oxonk’anu, mk’ule goxtimupe do paği havak dido feide meçaps.
|
TÜRKÇE
