DUDBUT'K'A

K'OLXOBA.ORG OTXO 3'ANERİ İQU…

K’avk’asiuri xalk’epe k’ala ok’omxvacuşi şiari na uğun, entepeşi derdepe na inarğups do entepeşi xeleba na irtups, K’olxuri noğarobaşi magek’idalepe, Lazi-Margalepe do Abxazi-Abazape iptinero K’avk’asiuri xalk’epeşi nena, tarixi, k’ult’ura na inç’els k’olxoba.org otxo 3’aneri iqu. K’avk’asiurobaşi şuurite ok’omxvacuşi, ok’onç’inuşi do ok’ortuşi misia na uğun sait’i çkinik maxutani 3’anas k’uçxe kogedu.

Şiddetis do xusumetis na nuğinz’ibups, şovenizmis na nuxizmet’ups, xalk’epeşi manebroba na oziyanaps noç’arepe na var gedumers k’olxoba.org-ik, “mi rt’astina zalimişa medgineri, mi rt’astina mazlumis eladgineri”-şi p’rensibite oç’andinaps. “Mazlumişi mudafa hak’i do adaletişi mudafa tkvala ren do zulmis nena ueşağu zalimis meşvelu tkvala ren”-şi dusturite imp’erialist’i, k’olonialist’i, mamovare do mak’udele zalimepeşi aleyhoba, noç’inaxe, monaxire, mağduri do mazlumi xalk’epeşi lehoba ikips. K’aderişi artoba na uğunan K’avk’asiuri xalk’epeş tarixuri duşmanepeşa oşkareburo go3’odginu şeni k’abğa ikips.

K’avk’asiuri xalk’epeşi p’roblemepe na iç’aren mak’alepe govoktirapt, K’avk’asiuri cinconi gamantanerepe k’ala cumaluri ok’optkvalupt, K’avk’asiuri xalk’epeş ok’ognagus mevuşvelupt. K’avk’asiurepeşi cumalobaş otesisu do K’avk’asiuri xalk’epeş ok’omxvacu şeni realist’i p’ersp’ekt’ivite vo3’k’ert. Antik’uri K’olxur noğarobaşi varisepeşen, çkini nananena Lazuri do çkini cumanena Margaluri oşanu şeni otxo 3’anaşen doni samimuro do cidduro xandape çkinis mevaqonopt.

Çkin dolongoneri voret, Ğormotik memişvelan bolaki.



                                                                                                                                                              TÜRKÇE