|
OŞKURNONİ T'RA3'A
T’ra3’a varna diyare, dğas ar faraşen dido, 3’k’aroni do çiçku oz’guşi xali ren. T’ra3’a ren nişani, alergia, gidaşi ent’oleransi, gidate na nik’limen zabunoba. T’ra3’a, mçxu mç’uk dobağineri 3’k’ari var a3’o3’onaşi yeçkindun. C vit’amini varna magneziumi dido eizdinaşiti iğodinen. T’ra3’a xuraşi fonk’sionepe normaluro noqonu şeni na uk’ors 3’k’arepeşi dork’inu tkvala na ren dehidrat’asionişa gza meçaps. Dehidrat’asionik bilasa bere do 3’anerepes canşağobaşi oşkurnoni p’roblemepe na yoçkindinaps, manişa oşvelu na uk’ors oşkurnoni xali ren. T’ra3’a, xut 3’anerişen ç’it’a berepeş oğuruşi majura didi sebebi ren.
T’ra3’a k’ala korbaş 3’k’uni, gazi, gurişktala do ontxoru iz’iren. Sebebi muşişa mek’ireli t’u3anoba do di3xironi oz’gukti elak’limen. T’ra3’aşi irişen dido na iz’iren sebebi ren virali infek’sioni varna bakt’eriuli t’oksinepe. T’ra3’a, ak’ut’i varna k’roniuri iqopen. Ak’ut’i t’ip’i sum dolonişen mk’ule naqonops do sebebi muşi ekseri mik’robiuri ren. K’roniuri xali t’ra3’aşi sum dolonişen ginz’e noqonute geoç’k’aps do sebebi muşi ekseri mç’uşi zabunobape ren. Zabuni varna p’at’işi na imxors k’oçepes t’ra3’ak 3’k’arişi oşkurnoni gondinus gza meçaps do var işvelu na skidaluri şkurna yoçkindinaps. Edoxolo t’ra3’a umosi oşkurnoni zabunobapeşi nişani iqopen, misali dizant’eri, k’olera, bot’ulizm varna k’rohnşi zabunoba steri k’roniuri ar xalis onişanups. Apandisit’işi zabunepes ekseri t’ra3’a var iqvantina ap’andisiş ot’k’va3inuşi dido na iz’iren nişani ren. Radiasioniş zabunobasti t’ra3’a yeçkindun.
T’ra3’aşi şvela, zabunis na dvark’inu k’onari 3’k’ari oşumu ren, 3’k’aris lazimi na iqven cumu do namtini gidape ezdimu şeni elekt’rolit’epe ik’atas na k’ai iqven. Nizamuro, manişa do ç’it’a ç’it’a oç’k’omu, tamo tamo oç’k’omu do oşumu unon. Mç’ita xor3i, yağoni varna xrak’eri oç’k’omalepe, mjaşi maxsulepe, çik’olata, k’ave, alk’oli, gazozoni oşumalepe do suni oloqanonepeşen omendranu uk’ors. Higieni do izolasionik zabunobaş nak’limus nodgitun. Mara; çiçku berepeşi t’ra3’a, ç’it’a berepeşi vasati dereconi varna şiddetoni t’ra3’a, di3xironi t’ra3’a, jur dolonişen ginz’e oraş meqoneri t’ra3’a, uk’ramp’oni korbaş 3’k’uni, osap’aru steri zabunoaba k’ala alak’adari t’ra3’a, m3ika mordineri memleketepeş magolvepeşi t’ra3’a, oç’k’omale maxazirepe, ozabunale, bereş o3’k’edu, geriat’riuri varna rehabilit’asioniş ok’rebulepes t’ra3’a steri xalepes tibburi oxosaru tavsiye ixvenen.
|
TÜRKÇE
