|
AYDERİŞİ ABANOPE ŞVELAŞİ ORİGİNİ REN
Rizinişi Çamlixemşin coxoni noğaşi Ayderişi golas na ren, Turketişi k’oro3xeli abanopeşen ar teri na ren do dido z’abunobape ok’aaps yado na içkinen abanopes doloxeni do galeni t’urist’epek şvela gorupan.
Skidalaşi st’resişen do udodgineri temp’oşen omendranu na unonanpeşi nosişa 3’oxle na mulun svaepeşen ar teri na ren Ayderişi gola, 1987 3’anas t’urizmiş ok’rebule i3’opxinu. Ayderişi golaşi irişen beciti k’alifik’a3iape, ast’imişa k’ai na mulun t’aroni, topuri do abanope ren.
Golas, t’abiatis doloxe, golaşi oxorepe, ot’elepe, p’ansionepe do k’amp’i oxvenu şeni moxtimerepeşi çadiri do k’aravanepe artot dginan. Golas, kianaşi iri svaepeşen moxtimeri k’oçepe iz’irinen. Ayderişi golas çodinaşi 3’anapes na guin3’k’u ot’eli do so3ialuri t’esisepes dork’ineri dulyape doiçodinu. Am t’esisepeşen ar teri na ren do 3’anaşi vitojur tutas gon3’k’imeri na ren abanopes k’arta 3’anas doloxeni do galeni t’urist’epek şvela gorupan.
Uçazoğaşi T’eknik’uri Universit’et’is na ixvenu ar goşogorus, abanoşi 3’k’arepe romat’izmauri z’abunobapeşa, dudişi, korbaşi, di3xirişi z’abunobape k’ala opsimuşi, oşvanuşi do oxorcapeşi z’abunobapeşa na nirgen oxoi3’onu. Abanoşi 3’k’arepe xolo, egzama, sedefi do ağanmordalobaş p’up’uzepe steri t’k’ebişi z’abunobapeşi oşveluşti ixmarinen. 260 met’ro tudelobaşen 55 derece t’u3anobaten na gamulun abanoşi 3’k’ari, t’esisis doloxe 40 derece k’onari iqven. 3’k’ariş doloxe sodiumi, k’alsiumi, magneziumi, k’ina-aluminiumi sulfat’i, hidrok’arbonati, nitrati ioni do metasilik’atiş asit’i uğun.
Abanoşi 3’k’arepeşen faide oz’iru şeni havuzişa dolilinen, eşo xususi iboninen varna xvala işvinen. Mara abanoşa amaxtimu zarari na meçaps k’oçepeti ren. Mesela di3xiri na diben z’abunobape, mağali t’ansioni do gurişi z’abunobape na omç’unan steri. Emuşeni aşo k’oçepes abanoşa var amaxtanşa ar dok’t’orişa ok’itxu ç’irnan.
|
TÜRKÇE
