|
K'OLXOBA.ORG XUT 3'ANERİ İQU…
K’olxoba.org xut 3’aneri iqu namut, nananena çkini Lazuri oçvu, omordinu, ost’andardu şeni ixandeps, cumanena çkini Margalurişi xonari ognapu şeni iboden. Sait’i çkini maanşani 3’anaşa kamaxtu namut, nananenaşi laborat’uari oqopinuşi misionite oç’andinaps. Şurgedgineri art xalk’işi nena Lazuri omordinute, minobaşi k’abğa niçinen yado mudafa xveneri sait’i çkini, oşkari xandapete asimilasionişa medginuşi timsali iqu. Nananena şeni xveneri xandapes met’odi, disip’lini do ciddiet’i beciti oşinute ağani art 3’anaşa kogedgitu.
K’olxoba.org-ik, Lazuri nena şeni oxandu, goşogoru, nananena mutepeşi omordinu guri mutepeşis doluz’in k’oçepeşa meşvelu, entepeşi gamaçkinuşa omxvacu, entepeşi oxanduşa gza no3’iru şeni istik’en. K’olxoba.org, çkini nananena Lazuri şeni uk’ors nenaçkina, oç’aruşi mdade do nena oguruşi mat’erialepe oxaziru şeni, Lazuri nenaşa gaireti xveneri do k’aixeşa mordineri namzet’i k’oçepe k’ala ok’oişvels. Lazuri nenaşi meselepe otespit’u, goşogoru do otetkik’ute am meselepeşi oçodinu şeni icehden. Lazuri nenaşi şivepe artimajuraşa oxolosu şeni xandape muşis naqonops, amuşeni xveneri xandapes noxosars. Xes muxteps k’onari nenaluri ç’araloba Lazuri nenaşa goktiraps do Lazuri nenas odudepe munz’inaps.
K’olxoba.org-ik, noğira muşi gamaçkineri k’arta xanda k’ai do ilimuri met’odite ixor3elinen, met’odepe muk’onari mtini do moxva ren na xandapeti ek’onari udork’ine do ora muşis ixvenen yado icers. K’oçepe vana k’idalapeşk’elen Lazuri nena şeni xveneri xandape do noç’arepeş oarkivu, moxva renanpe gamaçkvinu noğira yado go3’idginaps. Xalk’i oqopinuşi şuurite, maksadi do noğiraşi artoba dolongoneri umde temeloni art k’idala otesisute, nananena do k’ult’ura çkini moxtanoraşa ninç’işinen yado Lazuri nenaşi mamudafepeşa arçkva gamognapaps.
Çkin vak’vandept, Ellak gemoğirsan bolaki.
|
TÜRKÇE
