|
ENERJİŞİ ODUDE TXİRİ
Txiri, huşgilepeşi (Betulaceae) familiaşen Corylus cinsi 3’opxups 3xik’i do calepeşi oşkari coxoe. Olande gverdkianaşi çuçuna k’ortapes irden do gidaşi maddepete xampa do xumusoni let’apes moçkva maxsuli meçaps. Nt’k’aberi, xomula do kereconi let’ape k’ai var a3’onen. Tudeni 3’k’ari mağala let’apes umosi k’ai var niçans, randimani m3ika aqven. 3’analuri 1000-2000 met’rekubi k’onari mç’ima unon. Txiris pesope dido k’ut’ali var uğun. M3’k’ili cinci var uğun. Qinoras but’k’a dobğapan. Txirişi ç’eşidepe didote muşebura utase ren yani xark’i cinsi k’ala itasaşi umosi k’ai randimani meçaps. Txiri art 3’anas moişvaceps, art 3’anas xila naçanen.
Basiti, murgvala but’k’ape muşişi k’ilavepe jur k’ibironi do m3’k’ili ren. Pukirepek but’k’apeşen 3’oxle pukiroras guin3’k’en. Mamuli pukirepe k’at’up’ina steri do 5-12 sant’imi ginz’enobas skit’a peroni renan. Daduli pukirepe dido ç’it’a, qinoraşi morgvalis k’ump’urepes elat’k’obun do 1-3 milimet’re ginz’enobas mç’ita peroni iqven. Xeç’ep’a muşişi gomorgvas mtelo vana k’ismo art k’adexp’ina uğun. K’adexp’inaşi şekli do bunye txirişi ç’eşidepeş oçinu şeni beciti ren. Ticareturi ğirsi mağala txirepe, Turkiaşi noğape Kotyora, K’eresulis ixaçken do i3’ilen. Txirepeşi %80 k’onari Uçazoğaşi k’ortas imralen. Uçazoğaşi k’ortaşen met’as Marmaraşi k’ortasti imralen. Txirişi kianuri omralobaşi %62-65 k’onari Turkias ixvenen do am sekt’oris Turkia maartani ren. Kianaşi irişen didi txiriş şirketepek, omralobali monop’oli Turkiaşi xes var t’as do txiri umosi epi ep’ç’opat yado Argent’ina, Okortule, Armenia steri diyarepes txiriş omralu oteşvik’apan do numxvacapan.
Txiri didote xila yado içk’omen edo xolo map’ast’alobas, mahelvalobas, maloqalobas do bilasa çik’olat’aşi sinaisti dido ixmarinen. Xeç’ep’a muşi iç’ven do it’ibinen. Txirişi yaği maeczalobas do maşuralobasti ixmarinen. Txiri enerjişi k’aixeşa odude ren. Xuras menceli do enerji meçaps, xura do ç’k’uaşi doç’k’indinoba oçodinaps. Guri do cerğvişi şursağobas dido nargen. K’olest’eroli om3ikanaps, gurişi rit’miş on3’uranus nuşvels. Nizamuro k’arta dğa txiriş oç’k’omuk gurişi k’riziş risk’iş om3ikanus dido tesiri oğodaps. Udi3xirobas nargen, xura do qvilişi omordinus numxvacups. Hemi mutepeşi şeni do hemiti korbaşi berepe şeni jurşuronepes txiriş oç’k’omu dido nargenan. Txirik seksualuri menceli omağalaps, varisepes nargen. Txiri, grip’i do purpuşi zabunobape şeni dido feidoni ren. Edo xolo t’k’ebi omskvanaps.
|
TÜRKÇE
