|
K'OLXİ MABUT'K'UCEPE UONÇ'ELOBAS KAE3'ALES
Turketişi doloxe 4,5 milyoni k'arvani but'k'ucişi renoba içkinen. Am rak'ami, kianaşi maxutani k'arvanişi ok'obğala ren. Mara na kaizdinen topurişi didinobas maşkvitani siras ren. Turketişi doloxe ar 3'anas 70.000 kg topuri kaizdinen do 38.000 ocaxik mabut'k'ucobate skidun. Turketis, ar 3'anaşi doloxe ar k'arvani şeni arit’met’iuri oqopinot 17 kg topuri anç'en. Morderi dobadonapes am k’ilogrami sum fara (% 300) dido ren. Turketiş ar 3'anaşi topuriş p’ot’an3ia minimumi 700.000 kg ren. 3'anas 2,2 milyoni nana but'k'uci dvaç'irs Turketis mara 3'anaşi doloxe mak’simumi 200.000 nana but'k'uci ixmarinen do mağali k'alit’oni nana but'k'ucepeti dido va ren Turketişi doloxe.
K'olxi mabut'k'ucepeti hukumetişi uonç'elobaşen dido narğoni renan. K'olxi mabut'k'ucepe şeni hukumetiş but'k'uciş p'olit'ik'a va ren, subvan3ia va ren do çkva mutuksaniti xolo eşo. Na skidunan nobargeşsvapes pukironi ncape dido var doskidu. K'arta ndğas aşo ncape mç'ipaşaşi incubalupan ok'vatu şeni. İrişen didoti hukumetik, muşi germapeş dixapeşi pukironi ncape k'vatups, İMF s hukumetis na uğun faiziş e3xupeşi meçamu şeni.
K'olxi mabut'k'ucepeşi didopek, an3'ineri orapeşakis ç'uburişi pukiriş oraşk'ule k'arvanepe muşi k'amionepeten K'arsi, Ardahani steri doloxeni noğapeşi mağali golapeşa niqonupt'es. Qinoba moxtaşk'ule xolo guiktert'es. Mara 3'oxleni steri ek’onomiuri xali va doskidu am otiruşi dulyas. Muşeni do, ekonuri dixaş mancepek but'k'ucepeş dodgimuşi kira şeni an3'ineri orapes dido geç'areli gorupan. Do xolo mutepekti mabut'k'ucobaşi dulya mç'ipaşaşi kodigures. K'olxi mabut'k'ucepeşi didopek aşo golapes xolo nulurnan do qinoba moxtaşi xolo uk'unikternan muşi dixapes, mara 3'oxleni steri bereketi va aqvenan didopete.
K'olxi mabut'k'ucepek na skidunan oput'epes, dido çaişi magverde ren, jileni namtini noğapeş oput'epeşen na mulun (Borçxaşi Rizinalepe). Am k'oçepek xolo mutepeşi k'arvanepeti mumernan Lazonaşa. Am dulya, pukiriş nca dido na va ren Lazona şeni, pukirişi udobağinoba didoti komonz'inu.
Kolxepe na skidunan noğapeşi k'oçepek didopete Lazonaşi ç'uburişi topuri k'ai a3'onenan. Muşeni do, topurişi k'ult'ura irişen dido ç'uburişi topurişen mulun mutepe şeni. Lazonas but'k'uciş k'arvani dido na ren şeni do ç'uburişi ncati dido na va doskidu şeni ç'uburişi topuri dido va iqven. Muşeni do, k'arvanişi majurani k'atişen topuri yizdinen do xolo masumani ko rennati maxutani k'atepeşen. But'k'ucis muşi şeniti topuri dvaç'irs. Emuşeniti ç'uburiş topurişi ğirsi dido mağali iqven. Lazonas, K'arsi do Ardahanişk'elen na mulun tipişi topuri dido va moi3'ondinen. Aşo tipişi topuri 30-40 lirate, ç'uburişi topuri 50-60 lirate gamiçinen.
Turketişi namtini noğapes na ren topurişi varna matopurepe şeni 3'opxineri k'op'erat’ifepe, Lazonas va ren. K'arsi do Ardahanişi topuri dido dvaqvannati tucarepek am topuri şeni Lazonas dido ç'it'a geç'areli meçapan. Edo emuşeni, Lazonaş mabut'k'ucepekti mutepeşi o3adebute am tipişi topurepe muşiş gamaçamus naqonenan do am dulyati dido meç'ireli iqven. Muşeni do, namtini orapes topurepe muşişi gverdi xe mutepeşis elaskidunan.
Do xolo Lazonaşi doloxe topuri şeni do emuşi maşvele mat’erialepeşi p’roduk3ia na ikips mutuksani fabrik'a va ren. Butk'ucişi sek’t'ori Lazonaşi doloxe dido p'at'işi xalis ren. Lazonaşi mabut'k'ucepeti hukumetişi uonç’elobaşen dido narğoni renan. Mutepe şeni k'ap'et'işi mabut'k'ucobaşi p'olit'ik'ape çumernan.
|
TÜRKÇE
