DUDBUT'K'A

K'OLOMBİŞİ MARGALİ MZOĞAREPE

Na giçkinan steri, K’rist’efori K’olombi Amerik’aşi k’ont’inent’i na z’iru k’oçi ren. Emuk 1492 3’anas coxope muşi “Sant’a-Maria”, “P’int’a” do “Ninia” na rt’u sum k’araviten Andaluziaş p’ort’i Palosişen ağani k’ont’inent’i ogoruşa mendaxtu. At’lant’işi ok’ianusi mek’ançvires do 12 Gimuas San Salvadorişi k’ok’is konadgites. Amuşk’ule Avrup’aşen dido k’oçepek igzales Amerik’aşa do aya k’ont’inent’i tamo-tamo yipşu.

Edo mitis var uçkin mara, K’olombişi am didi eksp’edi3ias Margali mzoğarepekti ak’ateenan. P’rofesori İuri Molaşxiak 1972 3’anas Meksik’aşi nananoğa na ren Meksik’oşa var iduşakis am ambari mitişk’elen şigneri var rt’u. Dudp’axi İuri “Nuevo Leoni”şi raionis ar fot’oşst’udias go3’ak’ideri ar t’abela koz’iru: “Mefot’ografe Molaşxia”. P’rofesorik guişaşu, dido int’eresi aqu do st’udioşa kamaxtu. Ekonaşis k’oçepek, Dudp’axi Molaşxia şeni am st’udioşi mance ren do Nevyork’is do Montrealisti filialepe uğun ya u3’ves. Amuşk’ule Mefot’ografe Molaşxias t’ilifoni gun3’k’es do emukti manişa komoxtu.

P’rofesori İuri Molaşxia, artneri gvari na uğun ar mz’axali muşi z’iruşi dido ixelu. Mefot’ografe Molaşxiak, P’rofesori İuri Molaşxiaşa Amerik’as na skidunan Molaşxiapeşen aşo ar ambari meçu: “Samargalos, ar oput’es sum cuma Molaşxia skidut’een. Entepek ar anzavuri doqvileenan do oput’eşen imt’eenan. Matxozinepek sum cumaşen ar teri donç’qoleenan edo emus çkva var agzaleen. Jur cuma pirali iqverenan do dido goxtimuşk’ule Sp’aniaşa, Bask’oniaşa komoxteenan. K’rist’efori K’olombik ağanmordale do menceloni k’oçepe gorupt’een eksp’edi3ia şeni do Molaşxiape koz’ireen. Molaşxiapek k’apt’ani muşi K’olombi na rt’u Sant’a-Maria coxoni k’aravis gexedeenan do mzoğas nadveenan. Ağani k’ont’inent’i na ren Amerik’as komoxvadeenan mara na moxvades dixape İndoeti açkineenan. Ç’it’a cuma Molaşxiak Amerik’as kodoskideen. Oşk’enda cuma Molaşxiak xolo Bask’oniaşa guikteen do ekonaşis nibargeen. Çkin ç’it’a cuma Giorgi Molaşxiaş motalepe voret, oşk’enaniş Bask’i Molaşxiape do umçane cumaşi motalepe Margali Molaşxiape.” ya tkveren.

Meksik’uri Mefot’ografe Molaşxiak P’rofesori İuri Molaşxia oxori muşişa uç’andu, mara mz’axali muşişi oxorişa var alu. Meksik’uri Molaşxiak ok’ule ocaxi mutepeşişi mcveşi svara komoğu do emuş doloxe K’olombiş mzoğarepeşi coxope na geç’art’u but’k’a k’ameraşa eşiğu do P’rofesori İuri Molaşxias komeçu.