|
KEMAL NEBİOĞLU DOMİĞURES
Turketis masendik’obaşi go3’oncğonerepeşen ar teri na ren Kemal Nebioğlu domiğures. 1926 3’anas Art’aşenis na dibadu Nebioğlu, geç’k’apuroni dogironi K’arsis, oşkendoni doguroni Vanis, liseti T’rabzonis oçodinu. Nebioğluk, Mp’olişi Universit’et’işi Huk’uk’işi Fak’ult’et’is ok’itxuşa gyoç’k’u mara umitelobaşi sebebiten var açodinu. Mp’olis met’alişi sek’t’oris map’rese oqopinot oxanduşa gyoç’k’u. Maamağobaşi skidalas megarsonoba, maçistoba, şefuri megarsonoba do maktaloba qu.
1961 3’anas Turketişi Madulyeşi P’art’ia (TİP) na k’idu vitojur mak’ideşen ar teri na rt’u Nebioğlu, 1962 3’anas p’art’iaşi generaluri sek’ret’erobaşa i3’opxinu. 1965 3’anaşi 3xunapes Turketişi Madulyeşi P’art’iaşen Tekirdağişi dep’ut’at’i i3xunu. 1975 3’anas So3ialist’uri Gektalaşi P’art’iaşi mak’idepeşen ar teri iqu do ç’it’a orasti am p’art’iaşi Mp’olişi Dudmaxvencoba qu.
DİSK (Turketişi Magektale Madulyeşi Sendik’apeşi K’onfedera3ia) na k’idu xut sendik’aş doloxe na rt’u Turketişi Oç’k’omalobaşi Sendik’aşi Dudmaxvenci oqopinot DİSK işi mak’idepeşen ar teri iqu. 1992 3’anas DİSK işi Generaluri Dudmaxvenci na i3xunu Nebioğlu, 12 Mirk’anis oç’opes do cixas moloxunes. 12 St’aroşinas DİSK işi davaşen ğuraşi cezaten muhakeme iqu do otxo 3’anaşi morgvalis, cixas molaxuneri skidu. Ti muşi şeni na guin3’k’u davapeşen ar terişi sebebiten ceza z’iru do majurapeşen muçitu. Nebioğlu, am davaşen anşi tutaşi morgvalis Metrisişi hapisxanas molaxedu.
Nebioğluk, DİSK işi irişen beciti k’aidepeşen ar teri na ren “Madulyepeşi nena do k’arari meçamuşi mance oqopinuşi p’rensibi” sendik’aluri ok’ok’idinuşa na moiğu do p’rat’ik’i na qu ar k’oçi ren. Sendik’apes demok’rat’iuri mak’aturoba na ikips, maktalobaşi degenera3ias na geladgitun do maktalobaş jin mteloras madulyepeşi k’ont’roli na moimers am p’rensibi çodinaşakis p’rat’ik’i qu do emus mxuci meçu. Ok’uleti “Fabrik’apeşi Madulyepeşi K’omisiape” şi p’rat’ik’i oxvenus gyoç’k’u.
Nebioğlus, Scala coxoni gamamçkumalaşen gamaçkvineri “Gok’u3xi” coxoni ar leksiş svara uğun. Çileri na ren Nebioğlus otxo bere uqonut’u. Nebioğluşi cenaze Mp’olis let’as niçinu. Sapula muşişi jin pukirepe yextas.
|
TÜRKÇE
