|
FİLİSTİNİŞİ MAJURANİ YEDGİTA
Filistinişi Majurani Yedgita, 28 St’aroşina 2000-s Filistinis geoç’k’ineri xalk’uri yedgita ren. Ariel Şaronik, am tarixis tak’ribi 1.000 askerite Haremmuşşerif coxoni mintik’as Mescidi Aksa moik’itxu. Am mok’itxaşa dido k’oçepeş k’elen p’rovok’asioni itku. Filistinurepek p’rot’est’ope qves do El Aksaşi yedgita coxineri majurani yedgita geiç’k’u. Majura yedgita, mk’ule oras Filistinişi onz’ğoni moijolu do İsraelişa goint’alu, K’undura 2005-s, Misirişi noğa Şarm El-Şeyxis, Mahmud Abbasi do Ariel Şaroniş k’elen xveneri mutarek’ete resimuro diçodu.
Ehud Barak’is xe3ala aquşi k’aobaşi medi diligzu mara dido var naqonu. 1999 3’anaşi St’aroşinaşi tutas ağani art Vye Riverişi akt’is imza geiğaru. Mara K’udusi, multecepe, Yahudepeşi dobarginu do onz’ğoni steri beciti meselepeşi ok’oğarğalupe nixargaleret’u. Filistinurepek xut 3’aneri mo3’qvaşi devres çkar mutu var mogeret’es do medi gundunut’es. Em orapes Barak’ik Suria k’ala mo3’qvaşi ok’oğarğalapes var geacginu do 21 3’anaşen doni Lubnanis dobargeri askerepe Pukrik’a 2000-s komuqonu. Arafati, çodinuri akt’i oxvenu şeni hemi Barak’i do hemiti K’lint’oniş k’elen indarinet’u. K’amp Davidis çodinuri akt’i oxvenuş medite jur doloniş morgvalis ok’oiğarğalu mara itilafi var ixvenu. K’elenarepes bilasa K’udusişi st’at’u do Filistinuri multecepeşi uk’uniktinuşi temapes itilafi var axvenes.
2000 3’anaşi çodinas İsraelişi dudnaziri Ehud Barak’is, yedgita do monz’ineri k’abğaş sebebite p’at’işi nandaru. Edo k’oalisioniti ik’an3’urt’u. Barak’ik, 10 Xrist’anas dudnazirobaşi vazife konaşkvu. 6 K’unduras xveneri goşo3xunas, Ariel Şaronik gecginu do dudnaziri iqu. İsraelurepes, 1990-oni 3’anapeşi 'moi3’qvinas do let’a niçinas' yado formuli var unt’es. İsraelis, Filistinişi meseleşa umosi k’ap’et’i mudahele oxvenu didopeş k’elen itasvibinet’u. Ariel Şaronik, Filistinuri mucahidepeşa suik’asti, putxaşi obombu do Filistinişi dixapeşa nat’k’va3inu monz’inuşi dido k’oçi doğuru. Filistinuri mucahidepekti İsraelişi noğapeşa goşot’k’va3inu monz’ines.
|
TÜRKÇE
