DUDBUT'K'A

ŞEHİD İZZETTİN KASSAM

İzzettin Kassam, 1880-s Suriaşi noğa Lazkiyeşi oput’e Cebeles dibadu. Filistinişi cihadis beciti roli uğun, didi alimi ren do Filistinis İslamuri minobaşi oçvuş k’abğaşi go3’oncğonerepeşen arteri ren. P’rigurapa oput’e muşis doçodinuş k’ule 1896-s Misirişi El-Ezher Universit’es gurapas geoç’k’u. El-Ezheris igurapt’uşi Misirişi İslamuri oxonk’anaşi go3’oncğonerepe k’ala temasi aqu. 1906-s universit’eşi gurapa doçodinuşi çkvadoçkva sotepes oç’andinus do gamantanus geoç’k’u.

İzzettin Kassam, tesironi vaazepe do ilimuri xandape muşite içinen. Filistinişi jin emp’erialist’i mencelepeşi do entepe k’ala ok’omxvaceri sionist’epeşi şkurnoni desisepe z’iruşi, 1921-s Filistinişi noğa Hayfaşa kodibargu. Ekonaşis hemi mamgureş gamantanute hemiti xalk’is İslamuri şuuri meçamute ibodu. Vaazepe muşis ekseri sionist’i texlik’eş jin dodgitu, xalk’i am texlik’eşa gonç’k’iru do cihadişa nuteşvik’u. Filistinişi dixape xes okaçeri İnglisepek, Yahudepeşi moqonuşa do dobarginuşa naqonesşi cihadi şeni oxaziruşa geoç’k’u. Am oxaziruşi devres ar k’ele samimuri cihadişa mak’ature omordinapt’u majura k’eleti teçhizati do para ok’orobu şeni ixandept’u. 5 İgrik’a 1931-s cihadi geiç’k’u do İzzettin Kassamişi mucahidepek el-Yecurişa nat’k’va3es edo maişgale İnglisepe k’ala ok’omxvaceri sum sionist’i doqviles. Am oğodaş k’ule hemi İnglisi maişgalepeşa hemiti entepeş k’elen Filistinişa dobargeri sionist’i t’erorist’epeşa dido ak’sionepe oğodes.

İzzettin Kassam, 1935-s silaxiş talimi şeni mucahidepe muşi k’ala geulvaluri noğapeşen Ceninişi xolos rak’ani Yabedişa eşaxtesşi, 500 k’onari İnglisi askerepek 3aş k’elen do dixaş k’elen gvak’ires. Kassamik do mucahidepek maişgalepaşa var iteslimes do ocedelus geoç’k’es. Ocedeluşi çodinas 20 3’ilva 1935-s, şeyx Kassam do mucahidepe muşişen namtinepe maişgalepeş k’elen işehidines, majurapeti iç’opines. Şeyx İzzettin Kassamik ilmi, tak’va, guramoba, k’araroba do İslamuri hasasoba muşite mucahidepeşa timsali iqu. Filistinişi İslamuri Nodgitaşi Oxonk’anaş askeruli xanç’alis “İzzettin Kassamişi mencelepe” icoxinen do emuşi şinaş oskedinu niğirinen.



                                                                                                                                                              TÜRKÇE