|
MANZ'AGERİ NENA BULGARULİ
Bulgaruli nena (Balgarski ezik), Hindu-Avrop’a nenaluri ocaxişen, omjore Slavuri nenapeşi art xanç’ali ren. Bulgariaşi Cumxuriet’işi resimuri nena ren. Bulgaria, Turkia, Uk’raina, Moldova, Mak’edoniaşi Cumxuriet’i, Serbia, Uçagerma, Romania, Hungaria do m3ika Bulgarepeşi dobargale geulva Avrop’a, AOO, K’anada do Avust’ralias 12 milyoni k’oçiş k’elen iğarğalen.
Bulgaruli nena 9. oş3’anuras oç’aruşi nena o3’opxinus geoç’k’u. Selanik’uri Azizi K’irili do cuma muşi Metodiyiş k’elen 862 3’anas Bulgariaşi k’asaba Preslavis 3’opxineri K’iriluri albonite iç’aren. Boncapeşi didope Grek’uri albonişen ezdimeri ren. Bulgaruli, geç’areli maartani Slavuri nena ren. Mcveşi Bulgaruli (9. oş3’anura-11. oş3’anura), oşka Bulgaruli (11. oş3’anura-15. oş3’anura) do moderni Bulgaruli (16. oş3’anuraşen amdğaşa) yado sum temeli devreşen golaxtimeri ren. Olande Hazarişen çveri do amdğaneri Bulgariaşa dobargeri p’rot’o Bulgarepeşen amdğaşa arxvala 20-30 zit’a doskideren.
Bulgaruli nenas 30 bonca uğun (6 xonaroni, 24 uxonare). Art xonaroni boncas geobaz’gaşi aşikari itelafuzinen. Uak’sane iqvaşi namtini xonaroni boncape var itkven. Umosi mk’ule do usarihe iqven. Ak’sani arxvala telafuzi şeni vardo artneri oras maana şeniti dido beciti ren. Bulgaruli nenas so geobaz’gasenşi nizami va uğun. K’arta zit’as ezberi oxvenu unon. Namtini uxonare boncapes zit’aşi doloxe telafuzi aktiren. Bulgaruli nenas sum ç’eşidi uxonare bonca uğun (çiçku, k’ap’et’i do otinuşi uxonare). Bulgaruli nenas coxopes sum ç’eşidi xali uğun (k’oçinuri, oxorcaluri do not’uri).
|
TÜRKÇE
