|
TURKETİŞİ İXİŞİ MAJURANİ SANT'RALİ
2000 3’anas Bozcaadas na ik’idu, Turketişi majurani ixişi sant’ralik am raionis na dvaç’irs mteli elekt’rik’uri energia omralaps. Mojomskide elekt’rik’aş energiati, Çanak’k’ales na dvaç’irs energiaşi % 5 k’onari şeni ixmarinen. İxişi sant’ralişi xeten ak’o elekt’rik’uri energia omralu şeni na dvaç’irs pasiti, ar 3’anaşi morgvali, xvala 4 batmani gresiuri yağişi para ren. Turketişi irişen didi ixişi energiuri sant’rali na ren Bozcaadaşi İxişi Elekt’rik’aş Sant’rali, 17 ixişi t’urbiniten ar 3’anas 38 milioni k’ilovat'uri saat’i elekt’rik’a omralaps. Amuşi pasi oqopinot, ar 3’anaşi morgvalis am t’urbinepes 4 batmani (80 k’ilogrami) gresiuri yaği isven. Avt’orit’et’epek na imralen energiaşi pasi şeni dido epi iqven ya zop’onan.
K’ok’işi Gyulvaşi Fenerişi xolos k’ideri na ren sant’ralik 17 t’urbini muşiten maartani 3’anaşi morgvalis 30 milioni k’ilovat'uri saat’i elekt’rik’a omralu. Uk’açxeneri 3’anapes opşa k’ap’asit’et’iten na ixandapu sant’ralik ar 3’anaşi morgvalis 40 milioni k’ilovat'uri saat’i elekt’rik’a omralu. Am energiaşi p’rodak’t’iten ar rek’oristi imza gidvinu. Kianas amk’ata energiuri sist’emapeşen feide oz’iramuşi p’ro3ent’i 30 na ren tina, Bozcaadaşi t’urbinepeşi p’ro3ent’i 45-şa imağalinu.
Bozcaadaşi İxişi Elekt’rik’aş Sant’ralişi avt’orit’et’epek ixişi t’urbinepek k’aixeşa ixandan yado ar 3’anaşi doloxe jur fara, t’urbinepeş sist’emapeşi t’upepes 4 batmani (8o k’ilogrami) gresuri yaği na opşes, ognapes. 17 t’urbinik k’ok’is na dubağasen k’onari energia na omralaps do emuşen met’i na imralen energiati na3ionaluri mosaşa ulun ya tkves. A3’i xususuri k’amp’aniaşi xes na ren am ixişi sant’rali 20 3’anaşk’ule devletişi xes niçinasunon. Turketişi maartani ixiş energiaşi sant’rali 1998 şi 3’anas Çeşmeşi Alaçati coxoni raionis ik’ideet’u.
|
TÜRKÇE
