|
K'ULT'URAŞİ NENA RUSULİ
Rusuli nena (Russkiy yazyk), Slavuri nenapeşen ren do Avrasias gont’aleri iğarğalen. Rusuli nena; Belarusuli do Uk’rainuli nena k’ala Hindu-Avrop’a nenaluri ocaxişen Slavuri nenapeşi yulva Slavuri tudeni grup’i 3’opxups. Rusuli nena 20. oş3’anuras siaset’urot beciti art nena ren do Ok’oxtimeri Miletepeşi xut resimuri nenaşen arteri ren. Rusuli nena; Rusia k’ala Uk’raina, Belarus, K’azakistan, K’irgizistan, Abxazia, omjore Osetia, Gagauzia, T’randinyester do K’irimişiti resimuri nena ren. Sovieturi Artobaşi ma3’opxe mcveşi cumxuriet’epes 3’oxleni k’onari gont’aleri var t’as nati xoloti iğarğalen. Sovieturi Artobaşi oras çkvaneri etniuri grup’epeşi noğarğale nenapeşi oxen3aluri siaset’i mani-mani iktiru nati didote Rusuli nena ixmarinet’u. 1990 3’anas Rusuli nena, Sovieturi Artobaşi resimuri nena ik’abulinu. 1991 3’anas Sovieturi Artoba goşibğuşi timeşletineroba mogeri ağani oxen3alepek mutepeşi nananenapeş omordinuşi siaset’is naqones. Mara amdğanerdğasti Rusuli nenaşi becitoba mintik’as naqonops.
Rusuli nenaşi tarixi 858 3’anas geoç’k’aps. Rusuli nenaşi sist’ema Slavuri nenapeşen moxtimeri ren do irişen dido zit’a Slavuri nenapeşen do mcveşi Rusuli nenaşen ezdimeri uğun. Rusuli nenas K’iriluri alboni ixmaren. 988 3’anas K’ievi Rusiaşi mapaskiri Vladimirik, K’onst’ant’inop’olisişen Ortodoksuri dini K’ievi Rusiaşa moiğu. Bulgari magamantane K’irili do Metodiusi cumalepek Slavepe şeni Glagoluri alboni 3’opxes. Glagoluri alboni Slavuri nenape şeni moxva var t’u. Emuşeni K’irili do Metodiusik ağani K’iriluri alboni 3’opxesşi İncili Slavuri nenaşa goktires. Em oraşen doni Rusuli nenas K’iriluri alboni ixmaren. Amdğaneri Rusuli albonis 33 bonca uğun.
Rusuli nena, beciti art ilmiuri gamaçkvaşi nena ren. Edo hemi k’amu hemiti xususi Rusuli k’idalapeşi Avrop’aluri k’idalape k’ala entegrasionişi p’rosesis, dulya do ticareti şeni becitoba mogeri nena niktu. Rusuli nena, ağani moderni art k’ult’uruli nena ren nati k’lasik’uri noç’arepeşi didope 19. do 20. oş3’anurapes iç’arinu şeni Rusuli k’ult’uraşi anderepe namut ç’araloba, xeşnoba, tiat’ro, op’era, enst’rumant’ali musik’a do bales xampanoba dido uğun. Rusuli nenas coxope; cinsis, k’oro3xas do xalis iktiren edo k’oçinuri, oxorcaluri do not’uri sum cinsi uğun. Coxopeşi cinsepeti do didonobaşi mem3xapeti oçkinu unon. Rusuli nenas ak’sanişi k’aide var uğun, zit’a ak’sani muşite oezberu unon.
|
TÜRKÇE
