|
K'AVK'ASORİŞİ XOCEPEŞİ OK'OK'İDİNU
Artvini, dido mskva oz’iramupe, kianaşi çkar dixas mengaperi muşi na var ren K’avk’asorişi xocepeşi ok’ok’idinupe do majura fest’ivali do şenobape k’ala oz’iramu na dvaç’irs ar noğa ren. K’arta 3’anaşi Mbulobaşi tutaşi masumani doloniş morgvalis t’radi3ialurot na ixvenen am fest’ivali xocepeşi ok’ok’idinupe k’ala onç’eloni ren.
Am ok’ok’idinupe na ixvenen tariğişen doni, xocepek zarari var z’iran do çkar mutu var naç’iran yado dido k’ai i3’k’edinen, namtini k’aidepeten iskedinen. Ok’ok’idinuşi oras umenceloni xoci arenaşen imt’u na, gecgineri işinen do mance mutepeşişk’elen iç’opinen do iqoninen. Aşoten K’avk’asorişi xocepeşi ok’ok’idinupe, muşi k’aidepeşi doloxe menceli o3’iramurot ar sp’ori do şenoba steri ixvenen.
Xocepeşi ok’ok’idinuşi ist’oria şeni aşo itkven: na içkinen steri Yulva Uçazoğaşi T’erit’orias do xolo Artvinis pukrinora gyoç’k’aşi k’arta 3’anas ekonuri xalk’ik 3xovarepe muşi k’ala golapeşa eşulunan. Golaşa eşaxtimuşi oras na muişvacinen svaepe ren. Am molaşi zenepes xocepek artikarti k’ala ok’vak’idenan. Ok’ok’idinupes na gyacginen xoci, 3xovarepes golaşi magzalobaşi go3’oncğonale aqven. Emuşeni golaşi magzaloba mo3’qvaten içodinen. Akonuri xalk’is antepe na uçkin şeni, 3’anapeşen doni na mulun gegapinorobaten, xususurot golaşa oxtimuşi oras mutepeşi xoci gyacginas yado qinobas bak’işi doloxe dido k’ai o3’k’ernan do çkar gale var gamaçkumernan.
Xocepeşi ok’ok’idinupes dest’e-k’uçxe-ç’it’a oşkendari-didi oşkendari-dudiş tude-dudi-sup’eruli coxoni k’at’egoriape uğun. İrişen beciti k’at’egoria dudi coxoni k’at’egoria ren. Am k’at’egoriape xocişi qalişi mçxunoba do monk’anobaşa o3’k’omiluten i3xunen do iri xoci iri k’at’egorias var ok’vak’idinen. Ok’ok’idinupe artikartişa t’qubineri k’aidepeten ixvenen. Kraepe muşi xususurot om3’k’ilaneri na ren xocepe disk’alifia ixvenen. Xocepe nat’uraluri zenis ok’ok’idinapu ar t’rade3ia ren. Ok’ok’idinupe vit k’oçoni ar k’omisiak oktalaps.
|
TÜRKÇE
