|
MT'K'AEPEŞİ DADALİ MŞKERİ
Mşkeri, fundagilepeşi (Ericaceae) familiaşen Rhododendron cinsişi çkvadoçkva ç’eşidoni do pukironi mzgudapeşi oşkari coxo ren. Mşkerepeti xolosi mzaxali mutepeşi yelepe steri p’ark’i do baxçapes moirdinen ğirsoni k’ivran3’a mzgudape renan. Am cinsiş ç’eşidepeşi xurape tamli, nadirenti didi calepe renan. İrişen ç’it’a ç’eşidi muşi 10-20 sant’imi, irişen didi ç’eşidi muşi 25 met’reşen ginz’e t’anoni iqven.
Mşkerepeşi namtinepek but’k’ape muşi dobğapan do namtinepekti iroras xanç’eni doskidunan. Mşkerepek kereconi let’ape var qoropan do irişen k’ai, x3eri mzgudapeşk’elen oxampineri asidoni do t’enoni let’apes irdenan. Ağani morçepes mjangişi peroni bundğape motvun. But’k’ape muşi t’k’ebi steri çkvaneri formis mara ekseri dari elipsi steri ren. K’arta k’un3’uli muşis indaren. Kinarepe muşi dolok’irk’oleri uğun. Jileni p’ici muşi çxant’eri uçala xanç’eni, tudeni p’ici muşi mjangişi peroni bundğapete keçe steri motveri ren. But’k’a muşişi t’ani 1-2 sant’imişen 50 sant’imişakis iktiren. Mbulora-Mariaşinaşi oşkes ipukiren. Pukiri muşişi qape bundğoni ren. 8-10 pukironi ç’abaşi forma uğun. Angi bundğoni, taci çani steri doloxendo skit’a xçe, galendo ntkireli dadalişi peri uğun. Etaminepe ginz’e filament’oni, filament’epe xçe do ubundğoni ren. Ovariumis bundğa uğun.
Mşkerepek, germa Himalayaşi mağala k’elepes dido mçire sahapes gont’aleri renan do olande k’utubişen K’avk’asiaşi germapeşa, Tibet’i, Çini, Jap’onia do olande Amerik’aşakis iz’irenan. K’avk’asia k’ala olandeyulva Anatoliaşi mağala germapunapes irdenan. Turkias tabiurot mşkerişi xut ç’eşidi ren. Skit’a pukironi mşkeri (Rhododendron luteum) geulva, oşke do yulva Uçazuğas, mori pukironi mşkeri (Rhododendron ponticum) Uçazuğaşi k’arta zuğap’iciş morgvalis, K’avk’asiuri mşkeri (Rhododendron caucasicum) Rizinis, T’amt’ras, Artvinis, penbe pukironi mşkeri (Rhododendron smirnowii) Rizinis, Artvinis, xçe pukironi mşkeri (Rhododendron urgernii) Artvinis irden. Anzeruli topuri do deli topuris majura topurepeşen çkvaneroba uğun muç’ot T’amt’ras, Rizinis do Artvinis mşkerişi pukirepeşen inç’valen şeni.
|
TÜRKÇE
