|
AŞİK'İ MAXSUNİ ŞERİF
Aşik’i Maxsuni Şerif (Şerif Çirik), 17 3’ilva 1939 Afşin-Kahramanmaraşis dobaderi Turki xalk’uri aşik’i ren. Maxsuni Şerifişi p’ap’uli Seyyid Mehmedişi turbeş gedgimeri oput’e Xasanik 1800-oni 3’anapeşi oşkes Sunnoba iterciherenan. Seyyid Mehmediş ğuraşk’ule ocaxi jur xanç’alişa ok’oirteren; art xanç’alik em oras Afşinişa mek’ireli Berçenek’işa dibargeren do Alevobaşa naqoneren, majurani xanç’alik oput’e Xasanis doskideren do Sunnoba ik’abulineren. Muşi otkute ocaxi Ağuçanişa mek’ireli Cerit Turkmenepeşen ren. Sulale muşik uk’ule Cirikli k’ercoxo geidveren. Ceritepe, Oğuzepeşi k’abile Avşarişi mensubi renan.
1955 3’anas, uk’ule Ank’araşa tireli Mersinişi astsubayi doguraleşa niç’aru. 1960 3’anas qoropeli muşi Suna xanumi omt’inu do 6 tuta oput’e muşis şinaxu. Em oras dogurale muşi Balikesirişa iğinu. Aşik’i Maxsunik doguraleşi k’umandaniş gayretite xolo doguraleşa uk’uniktu. 6 tutaş morgvalis doguraleşa var moxtuya do ixbari ixvenuşi doguraleşen geit’k’oçinu do xolo oput’e muşişa uk’uniktu. 1964 3’anas iptineri p’laği muşite musik’aluri p’iasaşa amaxtu. Mk’ule oras Gaziantebis dodgitu do uk’ule Ank’araşa mextu. 1989-1991 3’anapeşi oşkes Xalk’uri Aşik’epeşi Federasioniş k’elen kianaşi irişen didi masumani aşik’i goşi3xunu. Sivasişi drami coxoni birapa muşi, Sivasişi k’atliamis ğureli k’oçepeşa kadu. 2001 3’anaşi 3’ilvaş tutas, “Elhamdulillah K’izilbaşi do do laik’i vore. Arxvala ma var şkvit k’era çkimiti K’izilbaşi ren. Art k’abaet’i ren na eti p’ap’uli çkimişi renya.” tku şeni, DGM-ş k’elen (Oxen3ale Emniet’işi Omtinale) dava guin3’k’u. Ok’odgina 27 Xrist’ana 2001 tarixis DGM-s ixvenu.
2001 3’anaşi geç’k’alas izabunu, gurişi do oşvanuşi udobağinobaşi sebebite acili oşveluşa geiç’k’inu. Pukrik’aşi tutas ozabunaleşen gamaxtu. 17 Pukrik’a 2002 tarixis, çileri, ovro bere do otxo motaşi mance Maxsuni Şerifi, Alamaniaşi noğa Kolnis doğuru. Ğuruşi, DGM-s dava muşi var içoderet’u. Çodina oxori muşi Xaci Bektaş Veli kulliyeşi xolos, Çilexane coxoni mintik’as doxveri ren. Turkuli xalk’uri musik’aş mabirepeş k’elen zit’a do bestepe muşi dido ixmarinu. Dom dom k’urşumi, Komç’k’omi, Yuh yuh, Fadime çkimi, Dadali p’iconi çkimi, Cigerpare çkimi, Merdo, Çeşmi siyahi çkimi, K’atili Amerik’a do Kovalişi esiri steri eserepe muşite çineri Aşik’i Maxsunişi birapape dido xalk’uri musik’aşi do namtini pop’uri musik’aşi mabirepeş k’elen ibirinu. Aşik’i Maxsunik xalk’uri şiirişa guri meçeret’u do oğarğaluşi nena şiiri noktineret’u. Emus 453 p’lak’i, 50 k’aset’i do gamaçkveri 9 ketabi uğun. Edoxolo TRT-ş k’elen eşağeri 2 dok’ument’aruli filmi uğun.
|
TÜRKÇE
