|
XVAMERİ CA Ç'ADARİ
Ç’adari, ç’adarigilepeşi (Platanaceae) familiaşen Platanus cinsi 3’opxups do ginz’e t’anoni mçxu calepeşi ç’eşidi ren. Nandobadona muşi olande Amerik’a, yulva Avrop’a do Asia ren. Ç’adarepe mt’k’aepeşen dido ğalepeşi xolos irden do esasen omskvanuşi mzguda yado irgen. Ç’adarepe 3’k’arepeşi xolos, didi oncvinales do golvapunas landeşi ca yado di3igen. But’k’ape muşi tozişen do gazişen dido var itesirinen şeni didi noğapeşi caddepes, park’i do baxçepes dido dirgen.
Ağan 3’anerepeşen doni ekseri manişa irdenan. Ginz’e skidala uğunan. Xvameri ca niktanşi mçxu xura mutepeşiş doloxe x3as nati xoloti skidunan. Cirek’işi moçi meçamuşi xususoba uğunan. Ç’k’emi do gverdi dişkaşi puladepete imralenan. Ç’adarişi dişkaşen ondre3’epe, fuç’i, ğoberişi masari gamiğinen do mamobilialobas edoxolo oç’umale dişka yado istifade ixvenen. Tanen coxoni kerkepe muşi ink’ip’aziş maxvene do t’u3anobaş madork’ine yado doloxendo edo ant’iseptik’i yado galendo ixmarinen. Pukirepe muşi art cinsoni, mamuli do daduli pukirepe kiana steri ok’oxtimeri uğun. İxişi mencelite p’oleni mutepeşi ncğonupan.
M3ika ç’eşidi uğun. Yulvaluri ç’adari (Platanus orientalis), yulva Xçezuğaşi memleketepeşen Himalayaşakis iz’iren. Turkias arxvala yulvaluri ç’adari irden. T’ani muşi 30 met’reşa, xura muşi namtinoras 10 met’reşa nunç’uşun. Omçxvaneri xura muşi, gomorgvas gek’ideri qape muşi, gouçaneri lande yoçkinderi but’k’ape muşite ç’adaris, nesilepe e3’axuneri tarixi renya itkven. Osmanalişi oras çkineri noğapeşi meydanepes do camepeşi steğopes irişen dido niginet’u. Ginz’e skidala do ihtişamoni z’irapa muşi çineri ren. Osmanalişi noğarobaşi tabietişi unsurepeşen arteri ren. Ç’aralobas do xeşnobaşi majura xanç’alepesti coxo do şekli muşişa dido nigen. Geulvaluri ç’adari (Platanus occidentalis) irişen ginz’e t’anoni ç’eşidi ren. Namtinepeşi t’ani 50 met’reşen ginz’e ren.
|
TÜRKÇE
