|
ULKERSPORİ DO FENERBAHÇEK KOK'UİK'ATES
1994-1995, 1997-1998, 2000-2001 do 2005-2006 3'anapes şamp'ioni na iqu, 12 sezonişen doni Turketişi maartani p'rofesionaliuri bask’etboliş ligas na istert'u, ovro fara xolo Turketişi maartani p'rofesionaluri ligas finali na istereet'u, aşi fara Turketişi P’rezidentobaşi K'upa na kaezderet'u, sum fara Turketişi Federa3iaşi K'upa na kaezderet'u, vit 3'anaşen doni Avrop'aşi sup'eruli ligas na istert'u do xolo K'oraçişi K'upas gverdi finalis, sum farati Euro Ligas gverdişgverdi finalis na doskideret'u Ulkersporik a3'işk'ule xvala muşi coxoten va iqvasunon. Emuşeni, Turketişi didi t'ak'imepeşen ar teri na ren Fenerbahçeşi bask’etboliş t'ak'imi k'ala koko'in3axu. A3'işk'uleti am jur t'ak'imik Fenerbahçe-Ulkerspor coxoşi oqopinurot sp'orişi skidala mutepeşis naqonasunonan.
Ulkersporik na ink'ilu şeni k'elenerepes ipti dido p'at'işi a3'ones mara uk'açxe Ulkersporişk'elen na moxtu oxo3'onapate, Fenerbahçe k'ala na kok'in3axesşi ambaris k'elenerepek dido guik'vires. Uk'açxe am enteresani dulyasti oxvamç’k'es. Muşeni do, Ulkersporik ar firmaşi t'ak'imi rt'u do dido geç'arelepe gedumert'u bask’etbolişi sek’t’oris mara dido k'eleneri var uqonut'u muç'o eşo Efes Pilseni steri.
Ulkersporik, na içkinen steri 12 3'anaşen doni Efes Pilseni k'ala dido k'ap'et'işi rek'abet’işi doloxe ren do a3'iti Fenerbahçe steri didi ar camiaşi k'eleneriş avant'agia muşiti xes kodikaçu. Ulkersporik a3'i Efes Pilseniş 3'oxles umosi dido menceloni dgitun. İbrahim Kutluayikti Fenerbahçe-Ulkersporis ren, emuk Fenerbahçeşi camiaşen dirdu do dimçxvanu. Fenerbahçe-Ulkersporişi k'elenerepek na moxtasunon 3'anaşi liga xelebate çumernan do irişen didoti Efes Pilseni k'ala na isterasunonan maçepe do p'ot'an3ialuri finalepe ren xolo. Mu k'ai moxti, k'uçxe bedineri moxti Fenerbahçe-Ulkerspori. Gecginobape tkvanişi oz'iramuşi imendite.
|
TÜRKÇE
