|
İMAM MANSURİ
İmam Mansuri, Çeçenistanis K’avk’asiuri muridizmişi magedgine do oxen3aluri k’oçi ren. Çeçenuri coxo muşi Oççarma do baba muşişi coxo Jela ren. İmam Mansuri, Çeçenistanişi maartani dudcumxuri işinen do 1785-1791 3’anapeşi oşkes Rusiaşi İmp’arat’orobaşa Aldis geoç’k’ineri limaşen Anapas iyaralu do iteslimuşakis golaxtimeri oras K’avk’asias timoşletinerobaşi limaş mageç’k’ine do go3’oncğoneri iqu. Limapes geocginu şeni germaluri xalk’epek emus Mansuri (gecgineri) u3’ves.
İmam Mansuri, 1748 3’anas ğali Suncişi kinaris oput’e Aldis, ocaxi muşişi majurani biç’i yado dibadu. Bere rt’uşi mç’k’eşoba qu do uk’ule Dağistanis maçkinepeşen goşiguru. Dobadona muşişa goiktuşi camepes imamoba oxvenus geoç’k’u. İmam Mansuri gomorgva muşis dido iqoropinet’u. K’aterinaşi do Boro P’etroşi vasiet’epeşen arteri “olandeş k’ele goşont’alu” p’lanişi oras meidanişa gamaxtu. Mansurik, K’avk’asias tamo-tamo Rusepeşi gvak’iruşi şkurna muç’o ididanet’u z’iru do camepes vaazepe meçu. Mansurişi çinapa do tesiri goint’alu do 1783 3’anas 61 3’aneri rt’uşi gamognapapete Rusepeşa cihadi geoç’k’apu. Menceloni oğarğalu do ocerapu muşite mk’ule oraş doloxe olande K’avk’asias didi oxonk’ana geoç’k’apu.
İmam Mansurik Dağistanurepe k’ala kianuri k’arta Muslimani Rusepeşa ocahiduşa uç’andu do mutepeşa ak’atineri 10 vitoşi k’oçoni mencelite Rusepes ğali Terekişi melen k’ele atxozu. 1786 3’anas ç’it’a K’abardeyişi mint’ika işgalişen moşletinu. Ç’erk’ezepe oteşkilu şeni dido ibodu. Rusepek 1791 3’anaşi Mbuloraşi tutas 2 tumeni, 54 suvari boluği, 2 K’azaki alayi, 150 burti, uk’oro3xu cephanete Anapas xegedves. İmami p’at’işi yaraleri xalite Rusepeşa esiri niktu do Schlusselburgişi cixas molixunu. Zencirite nik’irinu do p’ot’e şkence iğodinu. K’avk’asiaşi cihadiş didi go3’oncğoneri, 13 İgrik’a 1794 tarixis doğuru.
İmam Mansurik, aya umdepe ik’abuleret’u: Maartani fizik’uri, majurani şaxsuri-cemieturi, masumani şuriuri temape. Fizik’i do xura şeni şeriati, şaxsi do cemieti şeni tarik’ati, şuri do maneviati şeni marifeti unt’u. İmam Mansurik, Çeçenepe do k’arta olande K’avk’asiurepe, jur zuğaş oşkes germaluri mintik’as dobargeri xalk’epe, p’ot’e ugoç’k’ondine ocahidu do ocedeluşi şekli mutepeşite kianuri tarixis konoç’aru. Mansuri mubareği k’oçi ren, xalk’i muşişa Muslimanobaşi didinoba do xvameroba oxo3’onapu do emuşeni.
|
TÜRKÇE
