DUDBUT'K'A

AXMAK'İ CASUSEPE

Ok’rebule muşi Londonis na ren Qini Limaş Oğodapapeş Goşogoraşi İnst’it’ut’i, golaxtimeri tutas int’eresoni ar goşogora muşi p’resaşi ok’oxtalaten ognapu. Goşogoraşi tema, Qini Limaş p’eriodiş casusepeşi ç’k’uaşi derece rt’u. Na ixvenu goşogorak, am p’eriodis na ixandinu casusepeşi beciti ar nak’onoba, ç’k’uaneri var, uk’itxeri do umosi mtini tkvalaten axmak’i na rt’es oxo3’onapu.

İnst’it’ut’işk’elen ok’oxtaleri, p’ensioneri do otxoneç 3’anerişen golaxtimeri mcveşi casusepeşi k’omisiak xut 3’anaşen doni na ixandept’u ignapinu. K’omisiak, juroşdojurneçdovitşen dido p’ensioneri casusepe şeni mpuleri ar goşogora qu. Goşogoraşi dido çkvaneri temapes epto int’eresoni çodinalape iz’iru. P’resaş ok’oxtalaşi organiza3ia na qu K’omisiaşi Dudmaxvence Riçardi Softhendik, casusepeşi psik’ologia şeni int’eresoni oxo3’onaloba qu. Aso3ialuri do k’ap’ula muşis k’ap’et’i ar avt’orit’e rt’as yado na unon k’oçepek gecgineri casusepe iqvenan ya tku. Mara gecgineri am casusepe şeni, mus na niçinen emirepe na ikips, ini3iat’ivi na var aqven, uk’itxu do axmak’i k’oçepe na iqvenanti oxoi3’onu ya tku.

Dudmaxvencek xolo, am k’alit’e na uğut’es casusepeşi gecgineri oqopinaşi sebebi Qini Lima rt’u yati tku. Softhendik aşo noqonu: “Zati jur k’ut’ubiş oşkendas motveri ar ak’t’i rt’u. Casusi oqopinu şeni ç’k’uaneri oqopinu var unont’u. Qini Limaşi casusepek na skidut’es p’eriodepes dido seriozuli na işinet’u xandape, andğaneri ndğaşi xeşnoxvene şeni k’omediuri temape ren. Mk’ule oraşk’ule gişepes dido geç’areli na mogapasunon k’omediuri casusiş filmepeşi osteramuk, casusepes muk’onari beciti dulyape na axvenes o3’irasunon.”

Riçardi Softhendik, aşo ren tina mcveşi p’eriodiş casusepeşi fant’eziape ağanmordale, xususurotti mcveşi Soviet’uri oxen3alepeşi ağnemordale genera3iapeşa modeli aqvenan, casusi vore ya na açkinenan dido ağanmordalepe aşo oxvenuten guri goindumenan ya tku. Namtini uğnose ağanmordalepekti am dork’inoba mutepeşi na ixmarnan k’oçepeşa guri mutepeşiten casusoba ikipan, aşo uğnosobaten na qvan dulyapeşi çodinas dido meç’ireli xalepes dololapan ya tku.



                                                                                                                                                              TÜRKÇE